Gjykata Kushtetuese e Kosovës njofton se vendimi në lidhje me çështjen e presidentes Vjosa Osmani do të merret vetëm pas një analizimi të detajuar të të gjitha aspekteve kushtetuese të rastit.
Në përgjigjen e saj, Gjykata thekson se procesi i vendimmarrjes do të zbatohet në përputhje me dispozitat ligjore në fuqi dhe standardet që rregullojnë funksionimin e saj. “Vendimi përkitazi me këtë rast do të merret pasi që të shqyrtohen të gjitha aspektet kushtetuese të pretendimeve të bëra në kërkesë nga pala parashtruese, në përputhje me Kushtetutën, Ligjin për Gjykatën Kushtetuese dhe Rregulloren e punës së Gjykatës”, thuhet në njoftim.
Ndërkohë, Gjykata kishte vendosur më parë të bashkojë në një procedurë të vetme kërkesën e kryeministrit Albin Kurti dhe atë të 30 deputetëve të Lëvizjes Vetëvendosje lidhur me dekretin e presidentes Osmani.
