Në zonën e Zagorisë ndodhet një nga veprat më të veçanta të trashëgimisë kulturore, Ura e Nivanit, e cila njihet për rëndësinë e saj historike dhe arkitektonike. Ajo ka shërbyer ndër shekuj si një pikë kyçe lidhjeje mes zonave jugore, duke lehtësuar jo vetëm lëvizjen tregtare, por edhe shkëmbimet kulturore dhe shpirtërore.
Dikur, kjo urë ishte pjesë e një rruge të rëndësishme ku kalonin karvanet që lidhin Gjirokastrën me Përmetin. Udhëtarët ndaleshin fillimisht në Manastirin e Nivanit, më pas vazhdonin drejt Sheperit, kalonin Qafën e Dhëmbelit dhe përfundonin në Përmet. Sot, ura tërheq vizitorë për historinë e saj, arkitekturën karakteristike dhe natyrën piktoreske që e rrethon.
E ndërtuar mbi lumin e Zagorisë, ura lidh aktualisht Nivanin me Ndëranin e Topovës. Ajo gjendet pranë mullirit dykatësh të fshatit dhe afër Manastirit të Nivanit, një ndërtim që daton nga shekulli XVIII.
Nga ana arkitekturore, ura dallohet për formën e saj me kurriz të lartë në pjesën e harkut kryesor. Struktura përbëhet nga një hark i madh mbi rrjedhën e lumit dhe një hark më i vogël mbi tokë në anën e djathtë, si dhe një dritare lehtësuese mes tyre. Harku kryesor ka një hapësirë prej 13,4 metrash dhe është ndërtuar me qemer të dyfishtë me trashësi rreth 1,12 metra, ndërsa mbështetja e tij ngrihet rreth 3,5 metra mbi nivelin e ujit.
