Muzeu i Luvrit ka paralajmëruar një ndryshim të rëndësishëm në çmimin e biletave për vizitorët nga vendet jashtë Zonës Ekonomike Evropiane, duke filluar nga 14 janari 2026. Çmimi do të rritet nga 22 euro në 32 euro, një rritje prej 45%, që prek kryesisht turistët amerikanë dhe kinezë, të cilët përbëjnë pjesën më të madhe të vizitorëve të huaj.
Ky vendim është miratuar nga Bordi i Drejtorëve të muzeut pas incidentit të vjedhjes së 19 tetorit, me qëllim sigurimin e 15–20 milionë eurove shtesë në vit. Të ardhurat do të përdoren për rritjen e masave të sigurisë dhe përmirësimin e gjendjes strukturore të muzeut.
Ministrja e Kulturës në Francë, Rachida Dati, ka bërë të ditur se fondet e mbledhura do të kontribuojnë në projektin e rinovimit të muzeut, një plan që sipas Gjykatës së Auditorëve pritet të kushtojë mbi një miliard euro.
Nga ana tjetër, sindikatat kanë shprehur shqetësime për barazinë në qasje ndaj koleksioneve të Luvrit, duke theksuar edhe ngarkesën shtesë për stafin që do të duhet të verifikojë kombësinë e vizitorëve.
Muzeu i Luvrit mbetet ndër destinacionet më të vizituara në botë, me 8.7 milionë vizitorë gjatë vitit 2023, prej të cilëve 69% ishin turistë të huaj. /Gjurmuesi/
