Një rast i rëndë ka tronditur qytetin e Gjakovës, ku një qytetar ka raportuar vdekjen e bashkëshortes me të cilën bashkëjetonte, duke ngritur dyshime për trajtim të mundshëm mjekësor të paqartë.
Sipas raportit të tij, ai dyshon për ndërhyrje të ndërgjegjshme mjekësore, ndërkohë që me urdhër të prokurorit, trupi i pajetë është dërguar në Institutin e Mjekësisë Ligjore për obduksion, me qëllim sqarimin e shkaqeve të vdekjes.
Spitali i Përgjithshëm i Gjakovës ka reaguar menjëherë ndaj këtyre deklaratave, duke sqaruar se pacientja M.R. ka qenë në gjendje komatoze për më shumë se tre vite, duke qëndruar e shtrirë në Kujdes Intensiv Qendror gjatë gjithë kësaj periudhe. Sipas spitalit, trajtimi i saj ka qenë i pandërprerë dhe në përputhje të plotë me protokollet mjekësore për raste të tilla.
Reagimi i spitalit thekson se denoncuesi nuk është pjesë e familjes së pacientes dhe deklaratat e tij nuk përputhen me faktet, duke u konsideruar një tentativë për të njollosur punën e stafit mjekësor. Kujdesi Intensiv ka lejuar prani të kontrolluar të familjarëve gjatë gjithë kohës së trajtimit të pacientes, edhe pse operon me rregulla strikte për vizitorët.
Spitali shton se nuk është detyrë e tyre të hyjnë në çështje të brendshme familjare dhe nuk mund të lejojnë që deklaratat e pavërteta të ndikojnë në opinionin publik. Ata bëjnë thirrje që organet kompetente — Inspektorati Shëndetësor, Policia dhe Prokuroria — të trajtojnë rastin me seriozitet dhe të mos lejojnë që puna e punëtorëve shëndetësorë të cenohet për interesa personale. /Gjurmuesi/
