Komandanti i KFOR-it, Ozkan Ulutash, priti sot në Shtabin e KFOR-it në kampin Film City në Prishtinë shefin e Shtabit të Përgjithshëm të Forcave të Armatosura të Shqipërisë, gjenerallejtënant Arben Kingji. Gjatë këtij takimi, të dy gjeneralët shkëmbyen mendime dhe vlerësime mbi situatën e sigurisë në Kosovë dhe në rajon.
Në njoftimin e misionit të NATO-s u theksua se “Gjenerali Ulutash shprehu gjithashtu vlerësimin e tij të sinqertë për kontributin e vlefshëm të Shqipërisë në misionin KFOR”.
KFOR-i ripërsëriti angazhimin e tij për të zbatuar mandatin bazuar në Rezolutën 1244 të Këshillit të Sigurimit të OKB-së të vitit 1999, duke kontribuar për një mjedis të sigurt dhe për lirinë e lëvizjes për të gjithë banorët e Kosovës. Misioni punon në koordinim të ngushtë me Policinë e Kosovës dhe me EULEX-in, duke mbështetur rolet e tyre si reagues të sigurisë në vend.
