Me ardhjen e dimrit, shumë persona drejtohen tek vitamina C për të mbështetur sistemin imunitar, duke shpresuar të parandalojnë ose të lehtësojnë simptomat e ftohjes. Megjithatë, efektiviteti i saj pas shfaqjes së simptomave mbetet i diskutueshëm, sipas studimeve shkencore.
Vitamina C është një nutrient i tretshëm në ujë dhe funksionon si antioksidant, duke mbrojtur qelizat nga dëmtimi. Ajo gjithashtu ndihmon në forcimin e barrierës së lëkurës, e cila është linja e parë mbrojtëse kundër mikrobeve.
Studimet tregojnë se marrja e rregullt e vitaminës C mund të shkurtrojë kohëzgjatjen e ftohjeve me 10-30%, kryesisht tek personat me simptoma më të rënda. Ajo mund të lehtësojë edhe ashpërsinë e simptomave deri në 15%, për shkak të efekteve të saj antihistaminike që ndihmojnë kundër teshtitjes dhe rrjedhjes së hundës.
Përfitimet më të dukshme në parandalimin e ftohjeve janë tek personat që kryejnë aktivitet fizik të intensifikuar, si atletët, ku rreziku i sëmundjes u ul deri në 50% kur vitamina C merrej dy deri në tre javë para aktivitetit. Për personat që ushtrojnë aktivitet të moderuar, nuk ka prova të mjaftueshme për efekt të ngjashëm.
Është e rëndësishme të theksohet se vitamina C ka vlerë kryesisht kur merret para fillimit të simptomave; pas shfaqjes së ftohjes, ndikimi i saj është minimal. Përdorimi i doza të larta mund të shkaktojë diarre, të përziera dhe shqetësime stomaku, si dhe mund të ndërveprojë me disa ilaçe.
Për rezultate më të mira, rekomandohet konsumimi i frutave dhe perimeve të pasura me vitaminë C, si specat e kuq, agrumet, luleshtrydhet dhe brokoli, duke preferuar mënyra gatimi që ruajnë lëndët ushqyese. Doza ditore e rekomanduar është 90 mg për burrat dhe 75 mg për gratë.
