Kanceri vazhdon të përbëjë një ndër problemet më serioze shëndetësore në Kosovë, duke rënduar ndjeshëm sistemin publik shëndetësor dhe kapacitetet trajtuese në vend.
Numri i pacientëve që kërkojnë shërbime onkologjike mbetet i lartë gjatë gjithë vitit, ndërsa institucionet përballen çdo ditë me fluks të vazhdueshëm rastesh të reja dhe trajtimesh intensive.
Sipas të dhënave nga Qendra Klinike Universitare e Kosovës (QKUK), kanceri mbetet një nga sëmundjet më të shpeshta në vend, me rreth 2,100 raste të reja të regjistruara çdo vit. Kështu ka bërë të ditur drejtori i Klinikës së Onkologjisë, Ilir Kurtishi.
Sipas tij, vetëm gjatë periudhës janar – 20 mars, rreth 500 pacientë janë diagnostikuar dhe trajtuar për herë të parë në Klinikën e Onkologjisë.
Kurtishi ka theksuar se ngarkesa në këtë klinikë është e lartë, ku çdo ditë pune trajtohen rreth 250 deri në 300 pacientë në shërbimin e Onkologjisë mjekësore, ndërsa rreth 140 pacientë në ditë i nënshtrohen rrezatimit në shërbimin e Radioterapisë.
“Në Kosovë regjistrohen rreth 2100 raste të reja në vit, kjo përkthehet në afërsisht 170 -190 raste në muaj,pra për periudhën janar – 20 mars: rreth 500 pacientë të rinj të ekzaminuar/diagnostikuar dhe trajtuar në Klinikën e Onkologjisë për herë të parë. Çdo ditë pune rreth 250-300 pacientë trajtohen në shërbimin e Onkologjisë mjekësore dhe rreth 140 pacientë në ditë rrezatohen në Shërbimin e Radioterapisë, pra mbi 450 pacientë në total çdo trajtohen në Klinikën e Onkologjisë”, ka thënë Kurtishi.
Kanceri mbetet një nga sfidat më të mëdha të sistemit shëndetësor në Kosovë, si për nga numri i rasteve të reja, ashtu edhe për nga ngarkesa e vazhdueshme në trajtimin e pacientëve.
Sëmundjet malinje kërkojnë diagnostikim të hershëm dhe trajtim të specializuar, ndërsa institucionet shëndetësore po përballen me një fluks të lartë pacientësh që kërkojnë shërbime onkologjike gjatë gjithë vitit.
