Afati për regjistrimin e partive politike dhe formimin e koalicioneve parazgjedhore për zgjedhjet e parakohshme të 28 dhjetorit përfundon sonte në mesnatë.
Zëdhënësi i Komisionit Qendror të Zgjedhjeve, Valmir Elezi, ka bërë të ditur se deri tani 18 subjekte politike kanë plotësuar formularin e certifikimit për pjesëmarrje në zgjedhje. Subjekti i 18-të që është regjistruar është Aleanca për Ardhmërinë e Kosovës (AAK), e cila do të garojë e vetme në zgjedhje.
Ndërkohë, sipas gazetares Qëndresa Tërshani, edhe Nisma Socialdemokrate e Fatmir Limajt është gati të dorëzojë formularin për regjistrim për zgjedhjet e 28 dhjetorit.
Kjo situatë përfaqëson fazën përfundimtare të përgatitjeve për certifikimin e kandidatëve dhe koalicioneve për garën e ardhshme për Kuvendin e Kosovës. /Gjurmuesi/
