Afati për formimin e koalicioneve parazgjedhore për zgjedhjet e jashtëzakonshme të 28 dhjetorit po afrohet drejt përfundimit, dhe partitë politike po finalizojnë marrëveshjet e fundit.
Nga Komisioni Qendror i Zgjedhjeve është konfirmuar një koalicion i përbërë nga Lëvizja Vetëvendosje, Guxo, Alternativa dhe Partia Shqiptare Demokristiane, i cili do të garojë në këto zgjedhje. Lajmi u bë i ditur nga zëdhënësi i KQZ-së, Valmir Elezi.
Ai njoftoi se deri në orën 20:30 të së dielës, 17 subjekte politike kanë aplikuar për certifikim për pjesëmarrje në zgjedhje, prej të cilave tre janë koalicione të regjistruara në KQZ. Elezi shtoi se subjektet kanë afat deri më 7 dhjetor për të dorëzuar listat me emrat e kandidatëve për deputetë.
Koalicionet e regjistruara deri tani janë:
- Koalicioni “PAI – PDAK – LPB”, i përbërë nga Partia e Ashkalinjëve për Integrim (PAI), Partia Demokratike e Ashkanlive të Kosovës (PDAK) dhe Lëvizja për Bashkëveprim (LPB).
- Koalicioni “Koalicija VAKAT”, që përfshin Demokratska Stranka Bošnjaka (DSB), Bošnjačka Stranka Kosova (BSK) dhe Demokratska Stranka Vatan (DSV).
- Koalicioni “Lëvizja VETËVENDOSJE!”, i përbërë nga Lëvizja VETËVENDOSJE!, GUXO, Alternativa dhe Partia Shqiptare Demokristiane (PSHDK).
Ndërkaq, partitë politike që kanë dorëzuar aplikimin për certifikim janë:
- Lidhja Demokratike e Kosovës (LDK)
- Partia Demokratike e Kosovës (PDK)
- Kosovaki Nevi Romani Partia
- Jedinstvena Goranska Partija
- Za Slobodu Pravdu i Opstanak
- Kosova Demokratik Türk Partisi
- Partia Liberale Egjiptiane
- Partia Rome e Bashkuar e Kosovës
- Socialdemokratska Unija (SDU)
- Srpska Lista
- Iniciativa e Re Demokratike e Kosovës
- Fjala
- Nova Demokratska Stranka (NDS)
- Lëvizja Përparimtare e Romëve të Kosovës (LPRK)
Këto zhvillime tregojnë për një intensifikim të përgatitjeve parazgjedhore dhe vendosjen e ekuilibrit për garën e ardhshme për Kuvendin e Kosovës. /Gjurmuesi/
