Procesi për zgjedhjen e Presidentit pritet të hyjë në një fazë të re diskutimesh, pasi kryeministri dhe njëherësh kryetari i Lëvizjes Vetëvendosje, Albin Kurti, do të zhvillojë të hënën një takim me kryetarin e Lidhjes Demokratike të Kosovës, Lumir Abdixhiku.
Kjo vjen pasi Kurti u takua sot për herë të dytë në Kuvend me kryetarin e Partisë Demokratike të Kosovës, Bedri Hamza, por pa arritur ndonjë marrëveshje.
Pas takimit, Hamza deklaroi se PDK-ja ofroi një mundësi të fundit “për t’i shmangur zgjedhjet e re”. Ai bëri të ditur se kërkesa e tyre ishte që presidenti i vendit të zgjidhet nga një kandidat i propozuar nga kjo parti.
Nga ana tjetër, Kurti u shpreh se “kur s’ka mundësi për propozim konsensual, atëherë do të kemi propozime partiake” për president.
Takimi i radhës mes Kurtit dhe Abdixhikut do të zhvillohet saktësisht një javë pas takimit të tyre të parë në Kuvend lidhur me këtë çështje.
