Agjencia e Ushqimit dhe Veterinarisë ka konfirmuar praninë e bakterit Salmonella në një sasi mishi pule të importuar nga Rumania dhe të dorëzuar në Prizren. Kontrolli laboratorik ka zbuluar se 27.7 kilogramë nga ky import rezultuan pozitivë ndaj salmonelës.
Pas konstatimit të këtij rasti, gjithë sasia e mishit të infektuar u asgjësua menjëherë, në përputhje me procedurat ligjore dhe standardet e sigurisë ushqimore, për të shmangur çdo rrezik për konsumatorët.
Agjencia njofton se po vijon monitorimin e situatës me vëmendje të shtuar dhe po bashkëpunon ngushtë me institucionet vendore dhe ndërkombëtare, si dhe me kompanitë që merren me importin e mishit, për parandalimin e rasteve të ngjashme në të ardhmen. Publiku do të njoftohet në kohë reale për çdo zhvillim të ri lidhur me këtë çështje. /Gjurmuesi/
