Drejtoria Komunale e Arsimit në Prishtinë ka vendosur të riorganizojë procesin mësimor gjatë muajit të shenjtë të Ramazanit, duke përshtatur orarin në funksion të agjëruesve.
Sipas njoftimit zyrtar, mësimi do të nisë nga ora 07:30, ndërsa do të shkurtohet kohëzgjatja e ndërrimeve dhe do të reduktohen pushimet e gjata, me qëllim që i gjithë procesi të përfundojë jo më vonë se ora 17:00.
“Të nderuar nxënës, prindër dhe staf i shkollave të kryeqytetit, për shkak të muajit të shenjtë të Ramazanit dhe në respekt të agjëruesve, Drejtoria e Arsimit ka rishikuar organizimin e procesit mësimor. Është vendosur që mësimi të fillojë nga ora 07:30, të shkurtohet kohëzgjatja e mosndërrimit, si dhe të reduktohen pushimet e gjata. Këto ndryshime bëhen me qëllim që procesi mësimor të përfundojë më së largu deri në orën 17:00, pa u zvogëluar numri dhe kohëzgjatja e orëve mësimore, duke ruajtur cilësinë dhe vazhdimësinë e mësimit”, thuhet në njoftim.
