Ruajtja e shëndetit të trurit është një nga sfidat kryesore të moshës së tretë. Studimet e fundit sugjerojnë se angazhimi i vazhdueshëm në aktivitete që stimulojnë mendjen mund të ndihmojë në ruajtjen e funksioneve mendore dhe të ulë rrezikun për sëmundje neurodegjenerative si Alzheimeri dhe demenca.
Ekspertët theksojnë se kujdesi për trurin nuk lidhet vetëm me ushtrime klasike si fjalëkryqet. Aktivitetet që sfidojnë mendimin, zhvillojnë aftësi të reja dhe mbajnë trurin aktiv gjatë gjithë jetës konsiderohen thelbësore për ruajtjen e aftësive njohëse.
Sipas specialistëve, “ushtrimi i trurit” nuk nënkupton vetëm zgjidhjen e fjalëkryqeve, por përfshirjen në aktivitete të ndryshme që sfidojnë mendimin dhe zhvillojnë aftësi të reja.
Hulumtimet tregojnë se të mësuarit gjatë gjithë jetës, si leximi, shkrimi, mësimi i një gjuhe të re, loja e shahut apo zgjidhja e puzzleve, lidhet me një rrezik më të ulët të rënies njohëse.
Këto aktivitete aktivizojnë pjesë të ndryshme të trurit dhe ndihmojnë në forcimin e lidhjeve nervore.
Një studim i kryer me rreth 2 000 persona në moshë, të ndjekur për tetë vjet, zbuloi se ata që kishin qenë më aktivë mendërisht gjatë jetës u diagnostikuan me Alzheimer mesatarisht pesë vjet më vonë se ata me më pak aktivitet intelektual.
Për më tepër, ata treguan një rënie më të ngadaltë të aftësive të kujtesës dhe të mendimit.
Shkencëtarët e quajnë këtë fenomen “rezervë kognitive”. Kjo do të thotë se aktivitetet mendore gjatë jetës forcojnë rrjetet e neuroneve, duke e bërë trurin më të aftë të përballojë dëmtimet që mund të vijnë nga plakja ose sëmundjet.
Megjithatë, ekspertët theksojnë se nuk ekziston një formulë magjike për të parandaluar demencën.
Përveç stimulimit mendor, shëndeti i trurit lidhet edhe me stilin e jetesës: aktiviteti fizik, kontrolli i tensionit të gjakut dhe diabetit, ushqimi i shëndetshëm, gjumi i mirë dhe madje edhe vaksinimi kundër disa sëmundjeve mund të kontribuojnë në ruajtjen e funksioneve njohëse me kalimin e viteve.
