Instituti i Anatomisë Patologjike në Qendrën Klinike Universitare të Kosovës tashmë ka hapësira të rinovuara dhe të modernizuara për ofrimin e shërbimeve shëndetësore. Projekti synon përmirësimin e kushteve të punës për stafin dhe rritjen e cilësisë së diagnostikimit për pacientët.
Në ceremoninë e përurimit të këtyre hapësirave morën pjesë edhe përfaqësues të institucioneve shtetërore, përfshirë kryeministrin e Kosovës dhe ministrin e Shëndetësisë.
Është përuruar hapësira e rinovuar e Institutit të Anatomisë Patologjike në Qendrën Klinike Universitare të Kosovës. Të pranishëm në ceremoninë e përurimit kanë qenë edhe kryeministri Albin Kurti dhe ministri i Shëndetësisë, Arben Vitia.
“Në kuadër të këtij projekti janë zgjeruar dhe pajisur dy laboratorë: një i Imuno Histokimisë dhe i Patologjisë Molekulare. Janë riorganizuar dhomat e patologëve për më shumë specialistë, si dhe janë funksionalizuar hapësirat përcjellëse për punën e përditshme”, tha me këtë rast kryeministri Kurti.
Ai tutje tha se në 976 metra katrorë hapësirë është bërë transformim rrënjësor, duke i ruajtur vetëm muret mbajtëse dhe pllakat e mes katit.
Ndërkaq, ministri Vitia tha se investimet në shëndetësi do të vazhdojnë. “Ky vit do të jetë vit i diagnostikës, do të investohet te të gjithë laboratorët pa dallim, duke filluar me teknologji të re, dixhitalizim të laboratorëve etj.”, theksoi ministri i Shëndetësisë, Arben Vitia.
Merita Hashani, drejtoresha e këtij instituti, tha se ky renovim do të mundësojë rritjen e cilësisë për pacientët dhe në mirëqenien e tyre. Ajo tha se me këtë rast do të bëhet edhe shtimi i shërbimeve që ofrohen.
