Presidenti francez, Emmanuel Macron, ka reaguar nga Parisi lidhur me sulmet ushtarake ndaj Iranit, duke sqaruar pozicionin e Francës në këtë zhvillim të ndjeshëm ndërkombëtar.
Gjatë një mbledhjeje me këshillin e mbrojtjes dhe sigurisë kombëtare, Macron theksoi se Franca as nuk ishte informuar paraprakisht dhe as nuk kishte marrë pjesë në sulmet e ndërmarra nga SHBA dhe Izraeli. “Prioriteti ynë absolut është siguria e shtetasve tanë dhe e aseteve tona”, tha Macron.
Ai shtoi se “diplomacia duhet të rifitojë epërsinë”, duke nënvizuar nevojën për zgjidhje përmes dialogut dhe jo përshkallëzim të mëtejshëm të situatës.
Para deklaratës së tij, aleati i Donald Trump dhe republikani i lartë, Lindsey Graham, kishte reaguar ashpër, duke kritikuar Evropën Perëndimore si “jashtëzakonisht të butë” për qëndrimet e saj lidhur me zhvillimet e fundit.
