Në Gjykatën Themelore në Prishtinë, të enjten u zhvillua seanca për rastin e sulmit terrorist të 24 shtatorit 2023 në fshatin Banjskë të Zveçanit, ku tre të akuzuarit – Vladimir Toliq, Dushan Maksimoviq dhe Blagoje Spasojeviq – u përballën me administrimin e provave materiale.
Mbrojtësja e të akuzuarit Maksimoviq, avokatja Jovana Filipoviq, njoftoi se dëshmitari Millosh Radosavleviq ndodhet në Serbi për mjekim dhe dorëzoi parashtresë për përdorimin e deklaratës së tij të dhënë më 12 shtator 2024. Ajo kërkoi nga gjykata sigurimin e kësaj deklarate përmes rrugëve zyrtare, duke theksuar se dëshmitari nuk mund të garantohet të jetë i pranishëm në mars. Për këtë arsye, mbrojtja propozoi që deklarata e mëparshme të administrohet si provë.
Gjykatësi Ngadhnjim Arrni vendosi që seanca të vazhdojë me administrimin e provave materiale, duke marrë parasysh tërheqjen e propozimit për dëgjimin e dëshmitarit. Prokurori special, Naim Abazi, propozoi administrimin e një sërë provash të përfshira në aktakuzë, përfshirë raporte nga SHBA, materiale teknike nga Google dhe META lidhur me llogarinë elektronike të Maksimoviq, fotografi të armëve dhe municionit, si dhe video-incizime që lidhen me hetimet.
Avokati i të akuzuarit Spasojeviq, Ljubomir Pantoviq, kundërshtoi pjesën e provave që lidhen me mbrojturin e tij, duke argumentuar se ato nuk mund të lidhen në mënyrë objektive me të, duke përfshirë një fotografi të bërë dy vite e gjysmë para sulmit. Avokati Millosh Deleviq për Toliq dhe mbrojtësja Filipoviq për Maksimoviq ngritën pretendime për paligjshmërinë e administrimit të disa provave, përfshirë të dhëna nga telefonat dhe ekspertiza balistike.
Prokurori Abazi e mbështeti administrimin e provave, duke sqaruar se disa fotografi dhe material elektronik janë siguruar sipas legjislacionit në fuqi dhe përmbajnë të dhëna relevante për rrjetin e komunikimit mes të akuzuarve. Pala e dëmtuar gjithashtu mbështeti administrimin e provave, duke kërkuar përfshirjen e deklaratave të disa dëshmitarëve që kishin ndryshuar versionet e tyre gjatë procedurës.
Seanca përfundoi pa mbarim, dhe gjykata vendosi që shqyrtimi të vazhdojë ditën e nesërme. Gjykata Themelore, në vendimet paraprake, kishte refuzuar si të pabazuara kërkesat për hedhjen e aktakuzës dhe kundërshtimet ndaj provave, vendime që më pas u vërtetuan edhe nga Gjykata e Apelit.
Aktakuza e ngritur nga Prokuroria Speciale e Republikës së Kosovës përfshin 44 persona fizikë dhe një person juridik, të akuzuar për sulmin terrorist në Banjskë, ku gjatë përdorimit të dhunës me armatim të rëndë mbeti i vdekur rreshteri Afrim Bunjaku dhe u rrezikua jeta e zyrtarëve të tjerë policorë dhe civilëve.
