Monumenti NEWBORN, një nga simbolet më të njohura të 17 Shkurtit dhe të shpalljes së pavarësisë së Kosovës, është shndërruar mbrëmjen e sotme në skenë të një reagimi simbolik kundër proceseve gjyqësore që po zhvillohen në Hagë.
Menjëherë pas përfundimit të ngjyrosjes, monumenti është rrethuar me gardh metalik nga aktivistët e platformës “Liria ka emër”, duke e paraqitur simbolikisht si të “burgosur” nga Gjykata Speciale.
Rrethimi me hekur e ka kthyer ikonën e lirisë dhe pavarësisë në një imazh që përfaqëson burgun. Në gardh është vendosur edhe një tabelë me logon e Dhomave të Specializuara dhe me mbishkrimin: Kosova e burgosur!
Eliza Hoxha nga organizata “Liria ka emër”, ka thënë se ky reagim qytetar është ndaj një padrejtësie që e konsiderojnë historike dhe prek themelet e shtetit tonë.
NEWBORN-i, simboli i 17 shkurtit dhe i lindjes së Republikës sonë, siç ka thënë ajo, po burgoset simbolikisht për të pasqyruar ndjenjën e padrejtësisë që qytetarët dhe Kosova po e përjetojnë përballë proceseve gjyqësore që po zhvillohen në Dhomat e Specializuara të Kosovës në Hagë.
Me mbishkrimin “Kosova e burgosur”, Hoxha ka thënë se po e shprehin indinjatën lidhur me këto procese, pasi atje po gjykohen historia jonë, lufta për liri dhe procesi i shtetformimit të Kosovës.
Si të paraburgosur në Hagë, që pesë vjet po mbahet Hashim Thaçi, ish-presidenti dhe kryeministri që lexoi Deklaratën e Pavarësisë së Kosovës dhe udhëhoqi procesin e shtetndërtimit, po mbahen ish-kryeparlamentarët Jakup Krasniqi dhe Kadri Veseli, si dhe ish-deputeti Rexhep Selimi, figurat kyçe të rezistencës, lirisë dhe pavarësisë së shtetit të Kosovës.
