Një mision i rëndësishëm hapësinor ka nisur nga Florida e SHBA-së, ku raketa Falcon 9 është lëshuar drejt Stacionit Ndërkombëtar të Hapësirës për një operacion shkencor që do të zgjasë tetë muaj. Ky mision përfshin një ekuipazh ndërkombëtar dhe synon zhvillimin e teknologjive kritike për eksplorimin e hapësirës së thellë.
Në bord ndodhen astronautët e NASA-s, Jessica Meir dhe Jack Hathaway, astronautja e Agjencisë Hapësinore Evropiane, Sophie Adenot, si dhe kozmonauti i Roscosmos, Andrey Fedyaev.
“Kërkimet që ky ekuipazh do të zhvillojë në bordin e stacionit hapësinor avancojnë teknologji kritike për eksplorimin e hapësirës së thellë, duke sjellë njëkohësisht përfitime reale këtu në tokë”, tha administratori i NASA-s, Jared Isaacman.
Gjatë këtij misioni, ekuipazhi do të kryejë eksperimente shkencore të ndryshme që përfshijnë studime mbi bakteret që shkaktojnë pneumoni, përmirësimin e trajtimeve kardiovaskulare, prodhimin sipas kërkesës të lëngjeve intravenoze për misionet e ardhshme hapësinore, si dhe monitorimin e ndikimit të karakteristikave fizike në qarkullimin e gjakut gjatë fluturimeve hapësinore.
Eksperimente të tjera përfshijnë monitorimin automatizuar të shëndetit të bimëve dhe studimin e ndërveprimeve midis bimëve dhe mikrobeve që fiksojnë azotin, me synim përmirësimin e prodhimit të ushqimit në hapësirë.
NASA gjithashtu bëri të ditur se një anije e mëparshme e SpaceX Dragon, që transportonte shkencëtarët nga NASA, Roscosmos dhe Agjencia Japoneze e Eksplorimit Hapësinor, u kthye në Tokë më 15 janar. Kthimi i parakohshëm i ekuipazhit kishte ndodhur pas monitorimit të një shqetësimi mjekësor të një anëtari, pa dhënë detaje të tjera.
