Shqipëria pozicionohet më mirë se shumica e vendeve europiane sa i përket përdorimit të energjisë nga burime të rinovueshme, duke u renditur dukshëm mbi mesataren e Bashkimit Europian.
Sipas statistikave të publikuara nga Eurostat, 43.1 për qind e energjisë totale të konsumuar në Shqipëri sigurohet nga burime të pastra, ndërsa mesatarja e vendeve të BE-së arrin në 25.2 për qind.
Në krye të renditjes europiane janë vendet nordike, ku Suedia prin me 66 për qind energji nga burime të rinovueshme, e ndjekur nga Finlanda me 47 për qind, Letonia me 45 për qind, Danimarka me 44 për qind dhe Estonia me 43 për qind.
Në anën tjetër të listës renditen disa shtete të Europës Perëndimore. Irlanda zë vendin e fundit me 13 për qind, pasuar nga Malta me 14 për qind, Belgjika me 14.5 për qind, Luksemburgu me 15 për qind dhe Holanda me 16 për qind.
Pamja ndryshon kur analizohet vetëm prodhimi i energjisë elektrike. Në nivel të Bashkimit Europian, 47.5 për qind e energjisë elektrike prodhohet nga burime të rinovueshme, ndërsa Austria dhe Suedia i afrohen ose e tejkalojnë nivelin 90 për qind, falë shfrytëzimit të energjisë hidrike dhe asaj të erës.
Bashkimi Europian ka vendosur objektiva ambicioze për të ardhmen. Deri në vitin 2030, synohet që 42.5 për qind e energjisë totale të vijë nga burime të rinovueshme, një qëllim që kërkon investime të konsiderueshme, veçanërisht në sektorët e transportit dhe ngrohjes.
Të dhënat tregojnë se, ndonëse Europa po ecën drejt energjisë së pastër me ritme të ndryshme, Shqipëria përfiton nga potenciali natyror. Megjithatë, sfida kryesore mbetet diversifikimi i burimeve dhe ulja e varësisë nga karburantet fosile.
