Xhudistja kosovare Distria Krasniqi ka shkëlqyer në skenën ndërkombëtare duke u ngjitur në majën e podiumit në Grand Slamin e Parisit, në kategorinë deri në 52 kilogramë. Me paraqitje dominuese dhe përvojë të dëshmuar, ajo konfirmoi edhe një herë statusin e saj ndër më të mirat në botë.
Krasniqi zhvilloi një garë të fortë përgjatë gjithë turneut, duke përballuar xhudiste elitare në secilën fazë dhe duke e merituar plotësisht medaljen e artë. Finalja u mbyll shumë shpejt, ku në më pak se 10 sekonda ajo e mposhti me Ippon spanjollen Ariane Toro Soler.
Falë renditjes së lartë botërore, Distria e kaloi pa luftë raundin e parë. Në raundin e dytë, ajo dominoi ndaj francezes Alicia Marques, duke e kontrolluar ndeshjen që nga fillimi.
Në çerekfinale, përballja ndaj brazilianes Larissa Pimenta ishte tejet e vështirë. Ndeshja shkoi në kohë shtesë, ku Krasniqi arriti të sigurojë pikën vendimtare dhe kualifikimin në gjysmëfinale.
Gjysmëfinalja kundër francezes Amandine Buchard u karakterizua nga epërsia e qartë e xhudistes kosovare. Ajo siguroi një pikë të hershme, të njohur si “Yuko” në xhudo, të cilën e ruajti deri në fund të duelit.
Pasi i siguroi Kosovës medalje, Distria e vulosi suksesin në finale duke mposhtur sërish spanjollen Ariane Toro Soler, për t’u stolisur me medaljen e artë. Kjo është medalja e nëntë e saj në Grand Slamin e Parisit.
Ndërkohë, xhudistët e tjerë kosovarë nuk patën të njëjtin fat. Fationa Kasapi ishte më afër medaljes, por u ndal në repesazh nga xhudistja e Koresë së Jugut, Seyun Jang.
Laura Fazliu u përball me një situatë të pazakontë, duke u diskualifikuar së bashku me kundërshtaren Gili Sharir nga Izraeli, për shkak të pasivitetit.
As Akil Gjakova nuk arriti të avancojë më tej, pasi u mposht në raundin e dytë nga italiani Manuel Lombardo dhe u diskualifikua pas marrjes së tre dënimeve.
Po ashtu, Erza Muminoviq u eliminua në raundin e dytë nga spanjollja Eva Soler, duke i dhënë fund garës së saj në Paris.
