Interesimi i qytetarëve jashtë vendit për t’u përfshirë në procesin zgjedhor të këtij muaji ka qenë i lartë. Komisioni Qendror i Zgjedhjeve ka përfunduar verifikimin e aplikimeve për regjistrim dhe tashmë numrat janë bërë publikë
Sipas KQZ-së, gjatë periudhës 26 nëntor – 4 dhjetor janë pranuar mbi 55,600 kërkesa për regjistrim për votim jashtë Kosovës. Prej tyre, mbi 48,600 janë aprovuar, ndërsa më shumë se 6,400 janë refuzuar.
Nga aplikimet e aprovuara, shumica dërrmuese kanë zgjedhur të votojnë përmes postës. Rreth 35,000 qytetarë do t’i dërgojnë fletëvotimet në adresat postare jashtë Kosovës, ndërsa mbi 1,600 të tjerë do t’i dërgojnë ato në kutinë postare të KQZ-së brenda vendit. Përveç kësaj, mbi 12,000 shtetas janë regjistruar për të votuar fizikisht në përfaqësitë diplomatike të Kosovës.
Ndërkohë, vendi po hyn në proces zgjedhor të parakohshëm pasi Lëvizja Vetëvendosje nuk arriti të sigurojë shumicën e nevojshme parlamentare për të formuar qeverinë e re. Edhe pse doli e para në zgjedhjet e 9 shkurtit, 48 ulëset e fituara nuk mjaftuan, dhe pas dy përpjekjeve të pasuksesshme për të gjetur një partner koalicioni, vendi shkon sërish në zgjedhje. /Gjurmuesi/
