27 vjet pas një nga ngjarjeve më të rënda gjatë luftës në Kosovë, kujtimi i masakrës së Reçakut vazhdon të jetë pjesë e rëndësishme e historisë dhe ndërgjegjësimit ndërkombëtar. Në atë fshat të komunës së Shtimes, forcat paramilitare serbe vranë mizorisht 45 civilë shqiptarë, duke lënë një plagë të thellë në vend dhe duke tërhequr vëmendjen e botës.
Masakra u bë e njohur globalisht pas reagimit të menjëhershëm të shefit të atëhershëm të Misionit Verifikues të OSBE-së në Kosovë, William Walker. Ai, pasi pa trupat e pajetë të civilëve nga afër, ngriti alarmin për krime të rënda kundër njerëzimit që po kryheshin ndaj shqiptarëve.
Në Akademinë Përkujtimore të masakrës, Walker shprehu se nëse dikush do t’i thoshte atëherë se pas 27 vjetësh Kosova do të ishte një vend i lirë, nuk do ta besonte. “Para 27 vjetëve vizitova Reçakun për herë të parë, dhe për 27 vjet unë fola për atë që kishte ndodhur dhe që pash atë ditë. Po të më thoshte dikush që pas kaq vitesh do të isha para një vendi të pavarur do të thosha ‘je i çmendur’”, tha ai.
Walker theksoi se Reçaku ishte vendi që tregoi botës të vërtetën e Kosovës dhe se përpjekjet ndërkombëtare e mbështetën vendin në rrugën e tij për liri. Ai shtoi se shumë shtete i dolën në krah Kosovës për të konfirmuar dhe mbështetur të vërtetën e saj historike.
