Një operacion policor i zhvilluar në Tiranë ka çuar në zbardhjen e një rasti të rëndë të trafikimit të armëve të zjarrit. Gjatë ndërhyrjes, u sekuestruan 12 pistoleta me municion luftarak, të cilat dyshohet se do të shiteshin në zonën e Freskut.
Si rezultat i operacionit të koduar “Barriera”, Policia arrestoi në flagrancë shtetasin D. B., 27 vjeç, banues në Kosovë, i cili dyshohet se ishte pronari i armëve.
Operacioni u finalizua nga Specialistët për Hetimin e Krimeve të Komisariatit të Policisë Nr. 4, në bashkëpunim me Forcën Operacionale të Drejtorisë Vendore të Policisë Tiranë dhe nën drejtimin e Prokurorisë së Tiranës. Hetimet u zhvilluan për disa javë me metoda proaktive, në kuadër të parandalimit dhe goditjes së trafikimit të armëve të zjarrit.
Gjatë ndërhyrjes, Policia lokalizoi dhe ndaloi automjetin e dyshuar pranë mbikalimit të Tufinës, në dalje të Unazës së Madhe. Kontrolli i mjetit tip “Volkswagen”, që drejtohej nga i riu 27-vjeçar, zbuloi 10 pistoleta Glock të fshehur nën kofano, të shoqëruara me municion luftarak.
Në vijim të procedimit penal, Policia sekuestroi edhe dy pistoleta të tjerë Glock, duke e çuar në 12 numrin total të armëve të konfiskuara. Hetimet treguan se i arrestuari kishte për qëllim shitjen e armëve në zonën e Freskut në Tiranë.
Strukturat hetimore të Drejtorisë Vendore të Policisë Tiranë, në bashkëpunim me Prokurorinë, vijojnë punën për identifikimin dhe kapjen e personave të tjerë të përfshirë në këtë aktivitet kriminal. Materialet procedurale janë referuar Prokurorisë së Tiranës për veprime të mëtejshme ligjore.
