Administrata amerikane është duke përgatitur një takim të nivelit të lartë lidhur me situatën në Gaza, në kuadër të një iniciative të re ndërkombëtare të quajtur “Bordi i Paqes”, e udhëhequr nga presidenti Donald Trump. Takimi pritet të shënojë hapin e parë zyrtar të kësaj strukture dhe të fokusohet në çështjet e rindërtimit dhe stabilizimit të Gazës.
Sipas raportimeve, takimi është paraparë të mbahet më 19 shkurt dhe njëkohësisht do të shërbejë si konferencë për mbledhjen e fondeve për rindërtimin e Gazës. Megjithatë, planet janë ende në fazë fillestare dhe mund të pësojnë ndryshime.
Takimi pritet të zhvillohet në Institutin Amerikan të Paqes në Uashington. Ndërkohë, kryeministri izraelit Benjamin Netanyahu është planifikuar të takohet me presidentin Trump në Shtëpinë e Bardhë më 18 shkurt, një ditë para mbajtjes së takimit të Bordit të Paqes.
Shtëpia e Bardhë dhe Departamenti Amerikan i Shtetit nuk kanë dhënë komente lidhur me këto zhvillime.
Administrata Trump ka nisur kontaktet me vendet anëtare të bordit që nga e premtja, duke i ftuar udhëheqësit e tyre për pjesëmarrje në takimin e parë.
“Asgjë nuk është konfirmuar ende, por qeveria po e planifikon dhe ka filluar të shqyrtojë se cilët liderë mund të marrin pjesë “, ka deklaruar një burim.
Bordi i kësaj organizate të re ndërkombëtare numëron aktualisht 27 anëtarë dhe kryesohet nga vetë Donald Trump. Ai u krijua në fund të janarit me synimin për të adresuar konfliktet globale, një veprim që ka ngritur shqetësime te shumë ekspertë se një strukturë e tillë mund të minojë rolin e Kombeve të Bashkuara.
Reagimet ndërkombëtare ndaj ftesës së Trump për t’iu bashkuar kësaj iniciative kanë qenë të kujdesshme. Ndërsa disa aleatë të SHBA-së në Lindjen e Mesme janë bërë pjesë e bordit, shumë vende perëndimore kanë zgjedhur të qëndrojnë jashtë.
Një rezolutë e Këshillit të Sigurimit të OKB-së, e miratuar në mesin e nëntorit, autorizoi bordin dhe vendet që bashkëpunojnë me të për të krijuar një forcë ndërkombëtare stabilizimi në Gaza, ku një armëpushim i brishtë nisi në tetor, sipas një plani të Trump, të nënshkruar nga Izraeli dhe grupi militant palestinez Hamas.
Sipas planit të Trump për Gazën, i prezantuar në fund të vitit të kaluar, bordi do të mbikëqyrte qeverisjen e përkohshme të Gazës, përpara se të zgjerohej për të trajtuar konflikte të tjera globale.
Megjithatë, shumë ekspertë të të drejtave të njeriut kanë kritikuar këtë strukturë, duke e krahasuar me një model kolonial dhe duke theksuar mungesën e përfaqësimit palestinez në bord.
Armëpushimi në Gaza është shkelur vazhdimisht, me mbi 550 palestinezë dhe katër ushtarë izraelitë të raportuar të vrarë që nga fillimi i tij në tetor.
Sulmi izraelit ndaj Gazës që nga fundi i vitit 2023 ka shkaktuar vdekjen e mbi 71,000 palestinezëve, ka thelluar krizën e urisë dhe ka zhvendosur të gjithë popullsinë e Gazës.
Shumë ekspertë të së drejtës ndërkombëtare, studiues dhe një hetim i OKB-së e kanë cilësuar këtë situatë si gjenocid. Izraeli, ndërkohë, i konsideron veprimet e tij si vetëmbrojtje, pas sulmit të militantëve të udhëhequr nga Hamasi në fund të vitit 2023, ku u vranë 1,200 persona dhe u morën mbi 250 pengje.
