Shqipëria ka regjistruar rastet e para të gripit për sezonin aktual.
Sipas Institutit të Shëndetit Publik, gripi i tipit A, përfshirë nën tipin AH1N1, po qarkullon këtë periudhë, siç po ndodh edhe në shumë vende të tjera të Evropës. Personat e prekur kanë shfaqur simptomat tipike të gripit, përfshirë rrufë, temperaturë të lartë dhe bllokim të rrugëve të sipërme të frymëmarrjes.
Aktualisht, rastet e Covid-it dhe virozat e tjera mbajnë dominimin, por me ardhjen e stinës së ftohtë pritet të rritet numri i rasteve me grip, që do të përhapen në bashkëqarkullim me Covid-in. Ekspertët e Institutit theksojnë rëndësinë e vaksinimit ndaj gripit, veçanërisht për të moshuarit dhe personat me sëmundje kronike.
Sezoni i gripit nis zakonisht në fund të nëntorit dhe zgjat deri në fund të marsit, me intensitet maksimal gjatë muajve më të ftohtë, janar dhe shkurt. /Gjurmuesi/
