Zgjedhjet lokale në raundin e dytë u zhvilluan në një atmosferë të qetë dhe pa incidente të mëdha. Policia e Kosovës bëri të ditur se procesi zgjedhor u krye në kushte normale, duke garantuar sigurinë e votuesve dhe funksionimin korrekt të vendvotimeve.
Megjithatë, dy raste penale u regjistruan gjatë ditës: një në Fushë Kosovë për “dhënie dhe marrje ryshfeti në lidhje me votimin”, ku u arrestuan dy persona, dhe një tjetër në Klinë për “cenim të fshehtësisë së votimit”, me një person të arrestuar. Të arrestuarit u dërguan në mbajtje me vendim të prokurorëve kompetentë.
Gjithashtu, gjatë procesit u trajtuan 51 informacione të ndryshme që lidhen me zgjedhjet, por për të cilat nuk u gjetën elementë që përbënin vepër penale dhe u regjistruan vetëm si informacione.
Rreth 80 prokurorë ishin të angazhuar për të mbikëqyrur procesin dhe për të siguruar që zgjedhjet të zhvilloheshin pa probleme. /Gjurmuesi/
