Qeveria në detyrë ka marrë një vendim të përkohshëm për të zgjidhur çështjen e pagave të punëtorëve të Radio Televizionit të Kosovës, pas vazhdimit të protestave nga stafi i RTK-së.
Kryeministri në detyrë, Albin Kurti, tha se gjatë mbledhjes së sotme të Qeverisë do të ndahen mjetet e nevojshme nga kategoria e kursimeve. Ai e përshkroi këtë zgjidhje si një “improvizim i detyrueshëm” pas përpjekjeve të mëparshme për miratimin e buxhetit të RTK-së, që nuk u arrit për shkak të mungesës së votave të mjaftueshme.
“Që në muajin gusht ne bëmë një zgjidhje të përkohshme duke dhënë overdraft për RTK-në, me shpresën që pas konstituimit të Kuvendit dhe themelimit të komisioneve të arrihej një zgjidhje e qëndrueshme. Por partitë e tjera refuzuan pagat për RTK-në”, tha Kurti, duke shtuar se opsionet për daljen nga kjo situatë u shqyrtuan me kujdes dhe zgjidhja aktuale është përkohësisht më e mira.
Ministri në detyrë i Financave, Hekuran Murati, theksoi se zgjidhja e krizës në RTK ishte përgjegjësi e qeverisë, duke kërkuar aprovimin e kërkesës për shpërndarjen e mjeteve nga kursimet. Ky vendim vjen pas shumë grevave dhe protestave të punëtorëve të RTK-së, të cilët edhe sot vazhduan me kërkesat e tyre për pagat e prapambetura. /Gjurmuesi/
