Prokuroria Themelore në Gjakovë ka ndërmarrë masa ndaj 22 individëve të dyshuar për falsifikim të rezultateve zgjedhore në këtë komunë. Të dyshuarit janë ndaluar për 48 orë me vendim të Prokurorit të Shtetit.
Ata ngarkohen me veprën penale “Falsifikimi i rezultateve të votimit” gjatë procesit të numërimit të votave brenda subjekteve politike për zgjedhjet e deputetëve, të mbajtura më 28 dhjetor.
Ky veprim vjen si pjesë e hetimeve të Prokurorisë për të siguruar integritetin e procesit zgjedhor dhe për të ndëshkuar çdo shkelje të mundshme ligjore në lidhje me numërimin e votave.
