Presidentja e Kosovës, Vjosa Osmani, ka dërguar urime Albulena Haxhiut pas zgjedhjes së saj si kryetare e Kuvendit të Republikës.
Përmes një postimi në Facebook, Osmani theksoi rëndësinë e bashkëpunimit ndërinstitucional dhe funksionimit të plotë të Kuvendit, duke shtuar se kjo është thelbësore për forcimin e shtetit të së drejtës, stabilitetin demokratik, mbrojtjen e vlerave shtetërore e historike dhe avancimin e agjendës euroatlantike të vendit.
“Kuvendi i Republikës është themeli i demokracisë sonë parlamentare dhe institucioni ku materializohet vullneti i qytetarëve. Besoj fuqishëm se udhëheqja e re e Kuvendit do ta ushtrojë këtë mandat me përgjegjësi demokratike në respektim të Kushtetutës dhe me përkushtim ndaj interesit të Republikës së Kosovës. Në këtë moment të rëndësishëm institucional, ritheksoj nevojën bashkëpunim ndërinstitucional e konstruktiv dhe funksionim të plotë të Kuvendit, në shërbim të forcimit të shtetit të së drejtës, stabilitetit demokratik, mbrojtjes së vlerave tona shtetërore e historike dhe avancimit të agjendës sonë euroatlantike”, shkroi Osmani.
Ajo po ashtu uroi që mandati i ri të karakterizohet nga vendime të rëndësishme shtetërore, kulturë e lartë demokratike dhe angazhim i palëkundur në shërbim të qytetarëve dhe Republikës. “Uroj që ky mandat të shquhet për vendime të rëndësishme shtetërore, kulturë të lartë demokratike dhe angazhim të palëkundur në shërbim të qytetarëve dhe të Republikës sonë! Punë të mbarë dhe suksese në detyrën tuaj të lartë shtetërore!”, përfundoi Osmani.
