Prokuroria Themelore në Prishtinë ka bërë të ditur se ka ndërmarrë veprime konkrete hetimore lidhur me procesin e numërimit të votave në Qendrën Komunale të Numërimit në Drenas.
Sipas njoftimit, në bashkëpunim me Policinë e Kosovës – Drejtorinë për Hetimin e Krimeve Ekonomike dhe Korrupsionit, nga dita e sotme ka filluar intervistimi i anëtarëve të Qendrës së Numërimit dhe Rezultateve, përkatësisht i atyre të angazhuar në qendrën komunale në Drenas.
Këto veprime po zhvillohen në kuadër të hetimeve intensive, pas dyshimeve për keqpërdorime gjatë procesit të numërimit të votave të kandidatëve të subjekteve politike.
“Prokuroria Themelore në Prishtinë, në koordinim me Policinë e Kosovës, do t’i ndërmarrë të gjitha veprimet e nevojshme ligjore dhe hetimore me qëllim të zbardhjes së plotë të të gjitha rrethanave që lidhen me rasti. Prokuroria Themelore në Prishtinë do ta mbajë të informuar opinionin publik lidhur me të gjitha zhvillimet e mëtejshme në këtë proces”, thuhet në njoftim.
