Pas paralajmërimit për ndërprerjen e transportit publik në kryeqytet, disa linja private urbane kanë njoftuar gjithashtu pezullimin e shërbimeve të tyre për shkak të vështirësive financiare.
Kompania “24 Yjet” dhe linja 7B janë dy prej operatoreve që kanë konfirmuar ndërprerjen e punës, duke theksuar se nuk kanë marrë pagesa për shërbimet që nga muaji maj i këtij viti.
Në një njoftim për media, “24 Yjet” ka bërë të ditur se, megjithëse kanë pasur takime të vazhdueshme me zyrtarët e komunës së Prishtinës për të shmangur situatën, mungesa e pagesave ka bërë të pamundur operimin normal të linjave 10, 10A, 10B, 10C dhe linjës nr. 20.
Ndërsa drejtori i linjës 7B, Avdyl Brajshori, ka theksuar se vonesat e pagesave nga maji kanë ndikuar në furnitorët dhe partnerët bashkëpunues, duke penguar funksionimin operativ të linjës dhe aftësinë për të vazhduar ofrimin e shërbimeve për qytetarët.
Brajeshori ka shtuar se kompania do të kthehet në operim normal sapo të kryhen obligimet financiare ndaj saj dhe ka bërë apel për një zgjidhje të shpejtë të situatës. /Gjurmuesi/
