Një studim i Universitetit të Oksfordit ka nxjerrë në pah një lidhje të fortë midis niveleve të ulëta të vitaminës B12 dhe tkurrjes së trurit tek të moshuarit. Personat me mangësi të B12 kanë rrezik 6 herë më të lartë për atrofi cerebrale krahasuar me ata që kanë nivele normale ose të larta të kësaj vitamine.
Hulumtime të mëparshme gjithashtu kanë treguar se edhe nivelet “e ulëta-normale” të B12 mund të ndikojnë negativisht në shëndetin dhe funksionin e trurit.
Studimi, i botuar në revistën “Neurology”, përfshiu 107 vullnetarë të shëndetshëm, të moshës 61 deri në 87 vjeç, dhe u zhvillua gjatë pesë viteve. Pjesëmarrësit u skanuan me MRI për të matur ndryshimet në vëllimin e trurit, dhe rezultatet treguan se ata me nivel më të ulët B12 shfaqnin tkurrje më të shpejtë cerebrale.
Ky studim thekson rëndësinë e ruajtjes së niveleve të shëndetshme të vitaminës B12 për mbrojtjen e trurit dhe parandalimin e humbjeve njohëse me moshën. /Gjurmuesi/
