Një aksion i madh i Prokurorisë Themelore në Prizren, në bashkëpunim me Policinë e Kosovës, rezultoi me arrestimin e mbi 100 personave nën dyshimet për manipulime gjatë zgjedhjeve parlamentare të 28 dhjetorit 2025.
Pas autorizimit nga Prokuroria dhe intervistimit lidhur me dyshimet për kryerjen e veprave penale “Falsifikimi i rezultateve të votimit”, “Kanosja” dhe “Dhënia ose marrja e ryshfetit të lidhur me votimin”, me urdhër të Prokurorit të Shtetit, 109 persona u ndaluan për 48 orë.
Operacioni policor përfshiu rreth 200 pjesëtarë të Policisë së Kosovës dhe katër prokurorë nga Departamenti i Krimeve të Rënda, të cilët mbikëqyrën procedurat ligjore për sigurimin e prezencës së të ndaluarve gjatë hetimeve.
Të ndaluarit janë kryesisht komisionerë nga katër subjektet më të mëdha politike, por përfshihen edhe përfaqësues nga partitë e tjera. Prokuroria konfirmoi se veprimet do të vazhdojnë brenda afateve ligjore për të hetuar çdo dyshim për keqpërdorim të procesit zgjedhor.
