Kryetarja e Komunës së Preshevës, Ardita Sinani, ka zhvilluar një takim të rëndësishëm me komisionerin e Lartë të OSBE-së për Pakicat Kombëtare, Christophe Kamp, për të diskutuar gjendjen e shqiptarëve në Luginën e Preshevës dhe sfidat e vazhdueshme në këtë rajon.
Gjatë takimit, Sinani paraqiti një pasqyrë të detajuar të situatës aktuale, duke theksuar përkeqësimin e pozicionit institucional, shoqëror dhe ekonomik të shqiptarëve. Ajo vuri në dukje se, ndryshe nga avancimet e të drejtave të pakicave në rajon, Lugina e Preshevës mbetet një rast ku të drejtat po regjistrojnë regres përmes diskriminimit të strukturuar dhe izolimit institucional.
Kryetarja trajtoi moszbatimin e marrëveshjeve të mëparshme me autoritetet serbe, përfshirë Planin e Çoviqit (2001), Marrëveshjen e Trupit Koordinues (2009) dhe Planin me 7 pika (2013), duke i cilësuar si dokumente të paplotësuara për më shumë se dy dekada. Një problem thelbësor mbetet mosnjohja e diplomave të Kosovës, që detyron të rinjtë të migrojnë, si dhe politika e pasivizimit të adresave, e cila ka ndikim të madh, sidomos në Medvegjë.
Diskutimet përfshinë edhe diskriminimin në arsim, mungesën e teksteve në shqip, ndalimin e arsimit të lartë shqip dhe nënpërfaqësimin e shqiptarëve në institucionet shtetërore të Serbisë.
Në përmbyllje, Sinani i propozuar Komisionerit Kamp krijimin e një mekanizmi të posaçëm monitorues për Luginën e Preshevës, angazhimin e OSBE-së mbi çështjen e diplomave dhe adresave, si dhe nisjen e një dialogu të strukturuar OSBE–Beograd–Preshevë me raporte periodike. Ajo nënvizoi se përfshirja më aktive e OSBE-së është kyçe për mbrojtjen e të drejtave të shqiptarëve dhe ruajtjen e qëndrueshmërisë demografike dhe institucionale në rajon. /Gjurmuesi/
