Komisioni Qendror i Zgjedhjeve ka shpallur sot numrat e partive politike për fletëvotimet e zgjedhjeve të parakohshme parlamentare. Lajmi ka nxitur reagime të menjëhershme nga udhëheqësit e subjekteve përmes rrjeteve sociale, disa prej të cilëve kanë shpallur edhe sloganet e tyre.
Kreu i LVV-së, Albin Kurti, ka bërë të ditur se partia e tij do të mbajë numrin 116. Ai ka shkruar në Facebook: “Kemi numrin 116. Bashkë me qytetarët angazhohemi për një fitore edhe më të madhe.”
Bedri Hamza i PDK-së ka deklaruar se numri 130 qëndron si “numri i bashkimit për Kosovën”. Ai ka shtuar: “Është numri i stabilitetit, normalitetit dhe zhvillimit ekonomik. Është numri i drejtimit të sigurt dhe rrugës evropiane për vendin tonë. 130 është numri i fitores!”
LDK e ka lidhur programin e vet qeverisës me shpresën për vendin. Lumir Abdixhiku ka shkruar: “Zgjedh shpresën! 123 është numri ynë!”
Aleanca për Ardhmërinë e Kosovës do të garojë me numrin 129 dhe me sloganin “Krah teje”. Ramush Haradinaj ka deklaruar: “129 është numri i AAK-së në këto zgjedhje. Të renditur e në rresht si një, jemi krah teje Kosovë. Kosova na thërret! Na priftë e mbara!”
NISMA mban numrin 122 në këto zgjedhje, ndërsa deri më tani nuk ka pasur ndonjë reagim nga kreu i saj, Fatmir Limaj.
Publikimi i numrave nga KQZ-ja shënon një hap formal në nisjen e procesit të fushatës elektorale për zgjedhjet e parakohshme për Kuvendin e Kosovës. /Gjurmuesi/
