Presidenti i Barcelonës, Joan Laporta, ka shprehur gatishmërinë për të përmirësuar marrëdhëniet me Lionel Messin, duke nënvizuar rëndësinë e legjendës argjentinase për klubin dhe duke propozuar që ai të nderohet me një statujë në Camp Nou.
Laporta rikujtoi lidhjen e veçantë të Messit me Barcelonën, duke përmendur se nënshkroi kontratën e parë të futbollistit kur ky i fundit ishte vetëm 16 vjeç, duke e cilësuar si një nga momentet më të lavdishme në historinë e klubit. Ai shtoi se Messi meriton një njohje të plotë dhe një nderim publik.
“Unë nënshkrova kontratën e parë të Messit kur ai ishte 16 vjeç. Ajo që jetuam me të është një nga momentet më të lavdishme në historinë e Barcelonës, nëse jo më i madhi. Ai meriton një nderim, një statujë, njohje të plotë”, deklaroi Laporta.
Presidenti theksoi se është i gatshëm të rregullojë çdo gjë nga ana e Barcelonës dhe shprehu shpresën që rrugët e tyre të kryqëzohen sërish në të ardhmen: “Varet edhe nga pala tjetër. Jam i gatshëm të rregulloj çdo gjë. Messi i ka dhënë shumë Barcelonës, dhe Barça i ka dhënë shumë atij. Shpresoj të takohemi përsëri një ditë”.
Në fund, Laporta komentoi edhe largimin e kontrovershëm të Messit në vitin 2021, duke theksuar rëndësinë e institucionit mbi gjithçka: “Tema e Messit më trishton. Unë jam tifoz i Barcelonës, por mbi gjithçka është institucioni. Nëse do të isha anëtar, do ta kuptoja atë që bëri presidenti për të mirën e klubit”. /Gjurmuesi/
