Kryeministri i Kosovës, Albin Kurti, ka deklaruar se aktualisht nuk ekziston një marrëveshje politike për zgjedhjen e presidentit të ri, duke theksuar se situata mbetet e hapur dhe përpjekjet për arritjen e një zgjidhjeje do të vazhdojnë.
Kurti bëri këto komente pas takimit me kryetarin e Lidhjes Demokratike të Kosovës, Lumir Abdixhiku, ku çështja e zgjedhjes së presidentit ishte një nga temat kryesore të diskutimit. Ai theksoi se për momentin nuk ka një figurë konsensuale dhe situata është komplikuar pas qëndrimit të Partisë Demokratike të Kosovës, sipas së cilës kandidati duhet të jetë partiak.
“Ju e dini që ne, si subjekt fitues i zgjedhjeve, si Lëvizja Vetëvendosje, bashkë me partnerët tanë, Guxo dhe Alternativa, i kemi 57 deputetë. Së bashku me pakicat përbëjmë mazhorancën prej 66 deputetësh, por nuk i kemi edhe 14 të tjerë që të sigurohemi se gjithçka do të shkojë mbarë në ditën kur duhet ta zgjedhim presidentin e Republikës. Ju e keni parasysh që herën e kaluar, me 56 deputetë, u përpoqa të zgjidhem kryeministër për t’i arritur 61 vota; nuk u bë e mundur, përkundër faktit që gjithçka u stërzgjat për shumë muaj. Tash nuk jemi vetëm pesë deputetë larg, por 14 deputetë larg, gjë që e bën situatën më të vështirë,” tha Kurti.
Ai shtoi se si Lëvizja Vetëvendosje kanë mundësi të propozojnë një kandidat, sepse mund të mbledhin 30 nënshkrime të deputetëve. Bashkë me pakicat në mazhorancë mund të propozojnë edhe dy kandidatë të tjerë, pasi me 66 deputetë mund të sigurohen 60 nënshkrime. Opozita, pa përfshirë Listën Serbe, ka 43 deputetë dhe gjithashtu mund të paraqesë kandidatë. Kurti theksoi se Kushtetuta obligon që të shmangen zgjedhjet e reja dhe deputetët duhet të angazhohen për të arritur një marrëveshje.
“A do të realizohet kjo, nuk e di, por kushtet janë ideale që të kemi edhe tre kandidatë, ndërkohë që aktualisht nuk ka asnjë. Për shkak se mundësitë janë aty, do të vazhdoj të komunikoj, në mënyrë që nesër apo pasnesër të arrijmë te rezultati dhe pastaj te suksesi i zgjedhjes së presidentit. Por, për momentin, nuk mund të them se ka diçka të re, meqenëse në njërën anë nuk kemi figurë konsensuale, ndërkaq në anën tjetër nuk kemi as marrëveshje politike, sidomos pas deklarimit të PDK-së se propozimi duhet të jetë partiak. Kjo e bën çështjen më të ndërlikuar. Pra, nuk po flasim për emra të përveçëm; mbetet që nesër e pasnesër të shohim nëse mund të bëjmë ndonjë hap përpara, sepse, po e ritheksoj, kjo çështje e hapur i ka mundësitë reale dhe aktuale, por varet nëse do të përdoren,” tha ai.
