Një histori e shkruar me gjak, sakrificë dhe rezistencë të pandalur. Nga rrethimi brutal policor i vitit 1995 në Reçicë të Vogël, e deri te sfidat institucionale të ditëve të sotme – rrugëtimi i shqiptarëve të Maqedonisë së Veriut për të drejtën elementare të shkollimit dhe përdorimit të gjuhës amtare vjen i dokumentuar në mënyrë rrëqethëse.
Ky dokumentar i MAT në Klan Kosova sjell dëshmi ekskluzive, pamje historike dhe analiza për ngjarjet që vulosën fatin e shqiptarëve:
Çfarë do të ndiqni në këtë dokumentar?
Dëshmori i parë i Universitetit: Rrëfimi prekës i Besir Eminit, të birit të Abdylselam Eminit, i cili u vra me disa plumba në gjoks në shkurt të vitit 1995, teksa mbrohej Universiteti i Tetovës.
Kryengritja e vitit 2001: Si kulmuan pakënaqësitë e akumuluara nga diskriminimi në një konflikt të armatosur të udhëhequr nga UÇK-ja e Ali Ahmetit, që ndryshoi historinë e shtetit.
Prapaskenat e Marrëveshjes së Ohrit: Si u negociua nën presionin ndërkombëtar (Pardew, Léotard, Solana, Robertson) dhe si lindi kompromisi i madh i “20 përqindëshit” për gjuhën shqipe.
Përplasjet politike: Sfidimi i bllokadës së Gjorge Ivanov nga Talat Xhaferi dhe momenti historik i dëgjimit të gjuhës shqipe në Kuvend.
Rreziku aktual: Pse po tentohet të gjymtohet Ligji për Gjuhët në Gjykatën Kushtetuese dhe pse studentëve të drejtësisë sot po u mohohet dhënia e provimit të jurisprudencës në gjuhën shqipe?
