Analistja Nafie Selmani ka ngritur shqetësim lidhur me përdorimin e emrit “Metohia” për Kosovën në një libër gjeografie për klasën e shtatë, botim i vitit 2025 në Maqedoninë e Veriut. Ajo ka pyetur publikisht kryeministrin në detyrë të Kosovës, Albin Kurti, nëse pajtohet me këtë termin, duke e konsideruar një shkelje të identitetit kombëtar.
“Çdo herë që përdoret ky emër, është një provokim ndaj sovranitetit tonë dhe identitetit kombëtar. A ka të paktën një grimcë guximi politik për të kërkuar tërheqjen e këtij botimi skandaloz?”, ka shkruar Selmani.
Në reagimin e saj, Selmani akuzon edhe partnerët e koalicionit qeverisës në VLEN për mosveprim, duke theksuar se nuk po mbrojnë elementet më bazë të identitetit kombëtar të Kosovës. Sipas saj, libri i gjeografisë paraqet Kosovën me emrin “Metohia”, një term historikisht i përdorur nga Serbia dhe i papranueshëm për Republikën e Kosovës.
Publiku dhe ekspertët politikë po kërkojnë sqarime nga autoritetet kosovare dhe institucionet përkatëse në Maqedoninë e Veriut. Selmani thekson se mosreagimi i partnerëve qeverisës është shqetësues:
“A nuk u vjen pak turp burrave të VLEN-it që nuk arrijnë të mbrojnë as gjënë më elementare të identitetit tonë kombëtar? Apo, sipas zakonit, fajin e ka sërish Ali Ahmeti, Taravari, ai, ata, unë…të gjithë vetëm ata nuk kanë faj? Sa herë duhet t’ju poshtërojnë ata juve, pastaj ju neve, pastaj prapë ata juve, vetëm për atë kockë të vogël pushteti që ua kanë hedhur në sofrën e pushtetit? A keni të paktën një grimcë guximi politik për të kërkuar tërheqjen e këtij botimi skandaloz, e të provoni se vërtet ekzistoni pak përtej rolit dekorativ në qeveri?”, shkruan më tej analistja. /Gjurmuesi/
