Deputetët e Kuvendit të Kosovës janë informuar zyrtarisht për zhvillimet e fundit institucionale që lidhen me shpërndarjen e Legjislaturës së Dhjetë dhe procedurat që tashmë janë dërguar për shqyrtim në Gjykatën Kushtetuese.
Kryetarja e Kuvendit të Republikës së Kosovës, Albulena Haxhiu, përmes një shkrese zyrtare u ka përcjellë deputetëve dekretin e Presidentes Vjosa Osmani për shpërndarjen e Legjislaturës së Dhjetë.
Në dokumentin dërguar deputetëve, Haxhiu ka bashkëngjitur edhe dekretin e nënshkruar nga presidentja, me të cilin formalizohet vendimi për shpërndarjen e Kuvendit.
Po ashtu, ajo deputetëve u ka dërguar edhe regjistrimin e kërkesës me numër K.068/26 të Gjykatës Kushtetuese të bërë nga Kryetarja e Kuvendit dhe nëntë (9) deputetë të Kuvendit të Republikës së Kosovës lidhur me vlerësimin e kushtetutshmërisë së ,,Procedurës për zgjedhjen e Presidentit të Republikës së Kosovës.
