Kryetari i Komisionit për Legjislacion, Mandate dhe Imunitete, Përparim Gruda, ka reaguar ndaj propozimit për ndryshime kushtetuese të iniciuara nga presidentja Vjosa Osmani, të cilat lidhen me mënyrën e zgjedhjes së presidentit të vendit.
Sipas tij, ky proces nuk është në përputhje me Kushtetutën, ndërsa ka bërë të ditur se do të vendosin nëse do të marrin pjesë apo jo në seancën ku pritet të diskutohet kjo çështje.
“Ky është një proces komplet jokushtetues, prandaj do ta shqyrtojmë se a do të marrim pjesë në seancë për të shkuar për me i dhënë qendrimet tona, por seanca si e tillë është e papranueshme”, tha Gruda.
I pyetur nëse Partia Demokratike e Kosovës ka ndryshuar qëndrim sa i përket votimit të presidentit, ai theksoi se pozicioni i tyre mbetet i njëjtë.
“Qëndrimi vazhdon të jetë i njëjtë nuk votojnë kandidat partiak të një force politike, se kjo forcë politike ka fituar 50% të votave”, shtoi Gruda.
Ai gjithashtu theksoi se nuk do të mbështesin atë që e quajti “president diktat”.
