Një incident i rëndë sigurie është regjistruar sot pasdite në qytetin e Pejës, ku një këmbimore është bërë cak i një grabitjeje të armatosur. Ngjarja ka ndodhur në rrugën “Eliot Engel”, duke shkaktuar shqetësim tek qytetarët e zonës.
Rastin e kanë konfirmuar autoritetet policore, të cilat kanë dalë menjëherë në vendin e ngjarjes dhe kanë nisur veprimet hetimore për zbardhjen e plotë të rastit.
Zëdhënësi i Policisë për rajonin e Pejës, Fadil Gashi, ka dhënë detaje lidhur me ngjarjen.
“Rreth orës 14:45 dy persona kanë hyrë një këmbimore. Të maskuar dhe sipas ankueses njëri nga ta dyshohet se ka pasur armë. Meqenëse ajo është ndjerë e frikësuar ua ka dhënë disa para atyre. Siç deklaroi ajo nuk dihet se sa para kanë qenë”, tha Gashi.
Ai bëri të ditur se të dyshuarit janë larguar menjëherë nga vendi i ngjarjes.
“Të dyshuarit janë larguar nga vendi i ngjarjes në drejtim të panjohur. Policia ka dalë në vendin e ngjarjes dhe e ka nisur hetimet lidhur me rastin”, u shpreh Gashi.
Sipas tij, policia është duke punuar intensivisht për identifikimin dhe arrestimin e personave të përfshirë në këtë grabitje.
