Google po përgatitet të rikthehet në tregun e syzeve të zgjuara, duke synuar një debutim në vitin 2026, pas përpjekjes së parë që nuk pati sukses. Ky hap synon të vendosë kompaninë sërish në krye të inovacionit në pajisjet wearable.
Në vitin 2013, Google prezantoi Google Glass, një produkt që tërhoqi vëmendje të madhe për ekranin e tij mbi syrin e djathtë, por që u tërhoq nga tregu dy vjet më vonë për shkak të reagimeve të përdoruesve dhe shqetësimeve për privatësinë. Tani, kompania po planifikon një version të ri, më të rafinuar dhe estetikisht më të pranueshëm.
Syzet e reja do të ofrojnë mundësi për ndërveprim me produktet e inteligjencës artificiale të Google, përfshirë chatbot‑in Gemini. Kompania parashikon të nxjerrë dy modele: një variant pa ekran që përdor sensorë dhe komandë me zë, dhe një variant me ekran të integruar direkt në syze.
Megjithëse lansimi i parë pritet në 2026, Google nuk ka dhënë ende detaje për dizajnin final apo specifikat teknike të produktit. Eksperti i teknologjisë Paolo Pescatore këshillon që kompania të shmangë gabimet që çuan në dështimin e Google Glass.
Në të njëjtën kohë, Google do të përballet me konkurrencë të fortë nga Meta, e cila këtë vit ka prezantuar syzet e saj të mençura me AI, në partneritet me markat Ray‑Ban dhe Oakley. /Gjurmuesi/
