Një gjykatë në Bangladesh ka dhënë një dënim me vdekje për ish-kryeministren Sheikh Hasina, pas një procesi gjyqësor që zgjati disa muaj dhe e shpalli atë përgjegjëse për shtypjen vdekjeprurëse të një kryengritjeje studentore vitin e kaluar.
Gjykata Ndërkombëtare e Krimeve në Daka shpalli Hasinën, 78-vjeçare, dhe dy zyrtarë të tjerë fajtorë për krime kundër njerëzimit. Sipas të dhënave të Kombeve të Bashkuara, deri në 1,400 persona humbën jetën dhe mijëra të tjerë u plagosën gjatë asaj që konsiderohet një përpjekje për të shtypur protestat dhe ruajtur pushtetin.
Gjykatësi Golam Mortuza Mozumder deklaroi se ish-udhëheqësja ishte fajtore për tre akuza: nxitje, urdhër për vrasje dhe mosveprim për të parandaluar mizoritë, duke urdhëruar dënimin e saj me vdekje. Ish-Ministri i Brendshëm, Asaduzzaman Khan, u dënuar gjithashtu me vdekje për akuza të ngjashme, ndërsa ish-shefi i policisë Chowdhury Abdullah Al-Mamun mori pesë vite burg pas pranimit të fajësisë.
Vendimi i dhënë për Hasinën erdhi para zgjedhjeve të para në vend që nga përmbysja dhe arratisja e saj në Indi në gusht 2024 dhe u prit me brohorima dhe duartrokitje nga publiku brenda sallës së gjykatës. /Gjurmuesi/
