Barcelona ka konfirmuar vazhdimin e bashkëpunimit me Spotify, duke e mbajtur si sponsorin kryesor të fanellave dhe duke zgjeruar të drejtat për emrin e stadiumit në “Spotify Camp Nou”. Logoja e platformës do të jetë gjithashtu e pranishme në veshjet stërvitore për sezonet e ardhshme.
Sipas raporteve, marrëveshja nuk ka kaluar negociata të mëdha, pasi shumica e kushteve ishin përcaktuar më parë. Deri më tani, Barcelona merrte 57.5 milionë euro në sezon për fanellat dhe 5 milionë euro shtesë për stërvitje. Në kuadër të rinovimit, Spotify do të paguajë 65 milionë euro për fanellat dhe 10 milionë euro për veshjet stërvitore, duke e çuar totalin në 75 milionë euro në sezon, një rritje prej 12.5 milionë eurosh.
E drejta për emrin e stadiumit është zgjeruar deri në vitin 2034, me një klauzolë që i mundëson Spotify të tërhiqet në mënyrë të njëanshme në vitin 2028 nëse stadiumi nuk funksionon me 90% të kapacitetit. Kjo marrëveshje e zgjeruar do të hyjë në fuqi në fund të këtij sezoni dhe do të mbulojë sezonet e ardhshme të klubit katalanas. /Gjurmuesi/
