Klubi i basketbollit Vëllaznimi ka zyrtarizuar afrimin e qendrës amerikane Andrew Gordon, një lojtar me eksperiencë të madhe në basketbollin kosovar dhe ndërkombëtar.
Gordon, i cili dikur luajti për Trepçën dhe bëri paraqitje mbresëlënëse duke fituar trofe në dy edicione, rikthehet tani për të treguar sërish vlerën e tij në elitën e basketbollit në Kosovë. Përveç karrierës së tij në Trepçë, ai ka luajtur në liga të ndryshme ndërkombëtare, përfshirë Bullgarinë, Uruguain dhe së fundmi Britaninë e Madhe me Caledonia Gladiators.
Në karrierën kolegjiale, Gordon ka përfaqësuar West Virginia Mountaineers dhe Louisiana Tech Bulldogs, duke sjellë përvojë të madhe në parket. Vëllaznimi e ka mirëpritur lojtarin në skuadër me fjalët: “Mirësevjen Andrew, të fitojmë së bashku!”
Ky afrimi vjen në një moment kur Vëllaznimi nuk po kalon një formë të mirë në elitë; nga 11 paraqitje të zhvilluara këtë sezon, skuadra ka regjistruar tre fitore dhe tetë humbje. Me Gordon në radhë, pritet që skuadra të përmirësojë performancën e saj dhe të konkurrojë më fort për pozicionet kryesore. /Gjurmuesi/
