Ambasada e Shteteve të Bashkuara të Amerikës në Prishtinë ka reaguar ndaj vendimit të Komisionit Qendror të Zgjedhjeve për të mos miratuar listën e kandidatëve për deputetë të Listës Serbe, duke e vlerësuar atë si një veprim problematik në aspektin demokratik.
Sipas Ambasadës amerikane, një vendim i tillë bie ndesh me të drejtën themelore të qytetarëve për të zgjedhur përfaqësuesit e tyre përmes një procesi të lirë dhe demokratik.
“Çdo përpjekje për të shkelur këtë parim bazë minon partneritetin mes Shteteve të Bashkuara dhe Kosovës”, ka deklaruar një zëdhënës i Ambasadës amerikane në Prishtinë.
Më 31 janar, KQZ-ja shpalli rezultatet përfundimtare të zgjedhjeve të parakohshme parlamentare të mbajtura më 28 dhjetor. Megjithatë, gjatë mbledhjes, anëtarët e Komisionit miratuan listat e kandidatëve të të gjitha subjekteve politike, me përjashtim të Listës Serbe, e cila është partia kryesore e serbëve në Kosovë dhe mbështetet nga Beogradi.
Në votim, tre anëtarë të KQZ-së u shprehën pro, dy anëtarë nga Lëvizja Vetëvendosje votuan kundër, ndërsa anëtarët e tjerë abstenuan.
Pas këtij vendimi, më 2 shkurt, Lista Serbe ka dorëzuar ankesë në Panelin Zgjedhor për Ankesa dhe Parashtresa, duke kundërshtuar vendimin e KQZ-së.
