Në kuadër të bashkëpunimit mes institucioneve, Ambasada e Britanisë së Madhe ka dhuruar Policisë së Kosovës dy automjete dhe 16 dronë të pajisur me teknologji përcjellëse. Vlera totale e këtij donacioni arrin 153 mijë euro.
Sipas njoftimit zyrtar, këto mjete do të ndihmojnë njësitet policore në identifikimin, gjurmimin, monitorimin dhe përcaktimin e vendndodhjes së automjeteve dhe personave të dyshimtë.
Drejtori i Departamentit të Policisë Kufitare, Fehmi Xhata, dhe përfaqësuesja e Ambasadës Britanike në Kosovë, Emma Huntley, nënshkruan marrëveshjen për pranim-dorëzimin e këtij donacioni, duke theksuar rëndësinë e tij për forcimin e kapaciteteve të policisë.
“Pajisjet e specializuara do të luajnë rol shumë të rëndësishëm, do të ndihmojnë dhe profesionalizojnë edhe më tepër punën e Policisë së Kosovës, në veçanti të njësiteve kufitare të cilat kujdesen për parandalim të krimit transkufitar, kontrabandës dhe migrimit të paligjshëm”, u shpreh Xhata.
