Në orët e hershme të mëngjesit, Inspektorati i Komunës së Prishtinës, në bashkëpunim me Policinë e Kosovës dhe Agjencinë e Ushqimit dhe Veterinarisë (AUV), zhvilloi një aksion për largimin e shitësve ambulantë nga hapësira publike pranë tregut të automjeteve.
Gjatë këtij operacioni, 15 persona u gjobitën për tregti ilegale të shpezëve dhe bagëtive të vogla. Sipas zyrtarëve, aktiviteti paraqiste një rrezik serioz për shëndetin publik, pasi therja e kafshëve bëhej në kushte të papërshtatshme dhe pa kontroll higjieno-sanitar.
Drejtori i Inspektoratit, Bekim Brestovci, theksoi se hapësira nuk është e destinuar për tregti dhe se situata kishte potencial për përhapjen e infeksioneve. Ai bëri të ditur se rruga prapa tregut të automjeteve nuk do të lejohet më për këtë qëllim dhe u bëri thirrje shitësve që të aplikojnë pranë Drejtorisë së Shërbimeve Publike për hapësira të ligjshme.
Kryeinspektori Alban Ymeri njoftoi se çdo shitës që nuk respekton urdhrat e inspektorëve është gjobitur me 100 euro dhe se aksionet do të vazhdojnë deri në eliminimin e plotë të tregtisë ilegale në këtë zonë.
Agjencia e Ushqimit dhe Veterinarisë (AUV) paralajmëroi se blerja e produkteve të mishit në ambiente të hapura dhe të pakontrolluara është e rrezikshme. Përfaqësuesi i institucionit, Muharrem Shahini, theksoi se praktikat e tilla janë jo vetëm anti-higjienike, por edhe të palejueshme, duke shtuar se kontrollet do të shtrihen në të gjitha komunat e vendit.
Disa nga shitësit, të ardhur nga komuna të ndryshme të Kosovës, kundërshtuan vendimin dhe mbetën në rrugë si shenjë proteste përpara Policisë së Kosovës.
