Djersitja është një proces natyral dhe thelbësor për funksionimin e trupit. Përmes saj, organizmi largon lëndë të dëmshme si alkooli, kolesteroli dhe kripa, ndërsa njëkohësisht mbështet shëndetin kardiovaskular. Kur temperatura e trupit rritet, zemra punon më fort për të përmirësuar qarkullimin e gjakut, duke ndikuar pozitivisht në sistemin qarkullues.
Gjatë verës, djersitja shtohet për shkak të temperaturave të larta. Ky mekanizëm ndihmon në ruajtjen e ekuilibrit mes temperaturës së jashtme dhe asaj të brendshme, duke mbajtur stabilitetin e organizmit. Përveç kësaj, djersitja hap poret, përmirëson pamjen e lëkurës dhe mund të ngadalësojë procesin e plakjes. Ajo kontribuon edhe në humbjen e peshës, pasi në një orë djersitje mund të shpenzohen deri në 300 kalori. Po ashtu, ndihmon në uljen e nivelit të stresit.
Por çfarë ndodh kur djersitja tejkalon normën?
Djersitja e tepërt, e njohur si hiperhidrozë, për mjekët mund të jetë jo vetëm një gjendje e lindur, por edhe “sinjal alarmi” për çrregullime endokrine, përfshirë sëmundjet e tiroides, diabetin apo madje edhe sëmundje malinje. Në disa raste, prodhimi i djersës mund të rritet deri në 40 herë mbi vlerat normale. Zakonisht preken zona të caktuara si sqetullat, pëllëmbët ose fytyra.
Hiperhidroza shpesh fillon gjatë pubertetit (9–16 vjeç) dhe mund të vazhdojë gjatë gjithë jetës, me luhatje në intensitet sipas gjendjes psiko-fiziologjike të individit. Kjo gjendje mund të shfaqet në çdo stinë dhe zakonisht përkeqësohet në verë, pavarësisht temperaturës së ambientit.
Trajtimi i hiperhidrozës mund të jetë lokal, oral, kirurgjikal ose jokirurgjikal. Zgjedhja e metodës varet nga indikacionet, efikasiteti terapeutik, kohëzgjatja e veprimit, efektet anësore dhe kostoja. Megjithatë, trajtimi duhet të jetë i individualizuar dhe i përcaktuar në konsultim me mjekun, sipas gjendjes klinike të pacientit.
Për të minimizuar djersitjen e tepërt, rekomandohet përdorimi i sapunëve dhe detergjentëve që respektojnë pH-në e lëkurës, larja e shpeshtë e duarve dhe kujdesi ndaj çdo plage, sado e vogël. Duhet shmangur alkooli, duhani, kafeja, ushqimet pikante dhe çdo faktor që stimulon djersitjen. Dermatologët këshillojnë gjithashtu depilimin ose heqjen e qimeve në zonat që djersiten më shumë.
Nëse ndryshimi i dietës, veshjeve apo deodorantit nuk sjell përmirësim, rekomandohet konsultimi me mjekun. Aktualisht ekzistojnë barna dhe trajtime të ndryshme që mund të ndihmojnë në menaxhimin e këtij problemi.
